Sunday, July 28, 2013

පෙම්වත් වනරොද ඔහුගේ නම් වෙද



තණබිම් ඉද්දර
අහඹුව නැවතුනු
වන ගුල්මෙක අස
නැවතී හුන්නා

තුරුගොමු අතරින්
ලියවැල් නටමින්
වෙලේවි බඳ වට
හවසක ඇවිදින්


හිතමින් උන්නා
පතමින් උන්නා
අත් අල්ලාගෙන
යනතුරු කැන්දා

අහසට පෙමිනා
ඉහලට ඇදුනා
මිස තුරු අගිනා
බැල්මන් නොහුනා

දඩයක්කරුවෝ
දරමිටි කැපුවෝ
වනයට ඇදුනෝ
වනයෙන් මිදුනෝ

අදරැති සෙනෙහෙන්
මහකල් ගෙවුනා
කිකලෙක වනරොද 
ඉම නොම පරයා

හමරැළි වැටුනා
පස තෙත සිඳුනා
සුසුමෙන් සුසුමට
සෙවනැලි ඇරුනා

රංගය අවසන
බැරි පය ඔසවා
පෙම් බැඳි අරණට
යන්නට සිතුනා

පියවර සුඟකට
එපිටහ පැත්තේ
මතකය වහගෙන
මියැදී වැටුනා

වනයට රිදුනා
හුනිද නොඅඟවා
ඊයේ විලසම
ඉහලට වැඩුනා

දඩයක්කරුවෝ
දරමිටි කැපුවෝ
වනයට ඇදුනා
වනයෙන් මිදුනා

Friday, July 26, 2013

ගඟක වත


අනියම්ය ප්‍රේමය විටෙක
එකම උල්පත නොම සොයන්නට
බැතිමත්ය ප්‍රේමය
එකම ඌලක පැහැ සොයන්නට
විධිමත්ය ප්‍රේමය
හතර මායිම් පැන නොයන්නට
සිහිමදය ප්‍රේමය
විදුලි වැට උව ඉක්මවන්නට

පතිනිබර කදුරුද
පාමුලට යන ගැඹුරු දෙනිවල
ඉතා නිහඬව ගලා යනවා
කොයියම්ම අතුගඟක් අබිමුව

එහෙමමත් දවසක
දෙගම්මැදි බිම්වල
සරු පස පලා මතුවෙන
සුවඳ මල් පුසුඹට
දුවන හිතකට මදු තියමු තව ?

Sunday, July 21, 2013

පාපොච්ඡාරණය




නේරංජන ඉවුර මෙපිට
අවසඟ වී  දෙපය බරින
ආපහු නුඹ වෙතින් හැරුන
රාත්‍රිය මතකද

දිය ඇති නැති ගං වැල්ලට
මෙපිටහ ගංබඩ ඉඳඟෙන
කෙළෙස් කදක් උර තියාන
සුබ ගමන්ය යැයි පතන්න
කුහක උනා මං

සියෙරාමෙස්ට්‍රාවේ
කඳු බෑවුම් ගානේ
පාරමිතාදම් පුරාපු
චේ දැකලා නැත

ස්වාර්ථය බිම පාගා
පාරක් පාරක් ගානේ
දහදියරට ලේ හරවන
උඹ දැකලා ඇත


Related Posts Plugin for WordPress, Blogger...